khmeridol

ព្រះមហាក្សត្រិយានីនៃព្រះរាជាណាចក្រអេស៉្បាញ យាងទស្សនាកម្មវិធីសាលារៀនបើកចំហ - សេចក្ដីប្រកាស
ព័ត៌មានព្រះមហាក្សត្រិយានីនៃព្រះរាជាណាចក្រអេស៉្បាញ យាងទស្សនាកម្មវិធីសាលារៀនបើកចំហ ដែលជា គម្រោងសហការផ្ដួចផ្ដើមរវាងក្រសួងអប់រំ យុវជន និងកីឡា និងអង្គការវិទ្យាស្ថានបើកទូលាយ ក្នុងការប្រើ
ប្រាស់បច្ចេកវិទ្យា គមនាគមន៍ ព័ត៌មានវិទ្យាដើម្បីលើកកម្ពស់គុណភាពអប់រំនៅប្រទេសកម្ពុជា ។

ថ្ងៃនេះ ព្រះមហាក្សត្រិយានី សូហ្វីយ៉ា នៃព្រះរាជាណាចក្រអេស្ប៉ាញបានយាងធ្វើទស្សនកិច្ចនៅវិទ្យាស្ថានជាតិ
អប់រំ ដែលជាស្ថាប័នអប់រំមួយរបស់ក្រសួងអប់រំ យុវជន និងកីឡា ទទួលបន្ទុកបណ្ដុះបណ្ដាលគ្រូបង្រៀននៅគ្រប់វិទ្យាល័យទាំងអស់ក្នុងប្រទេសកម្ពុជា ។
នៅវិទ្យាស្ថានជាតិអប់រំ ព្រះមហាក្សត្រិយានីបានយាងទតទីកន្លែងនៃកម្មវិធីសាលារៀន
បើកចំហដែលជាគម្រោងផ្ដួចផ្ដើមដើម្បីបញ្ចូលបច្ចេកវិទ្យា គមនាគមន៍ ព័ត៌មានវិទ្យា
ជាភាសាខ្មែរក្នុងប្រព័ន្ធអប់រំ ។ ដោយមានការឧបត្ថម្ភគាំទ្រពីសំណាក់សហប្រតិបត្តិការអេស្ប៉ាញ
KhmerOS និងកម្មវិធីសាលារៀនបើកចំហ បានផលិតកម្មវិធីកុំព្យូទ័រឥតគិតថ្លៃជាភាសាខ្មែររួមមាន
កម្មវិធីវាយអត្ថបទ សៀវភៅបញ្ជី និងកម្មវិធីកុំព្យូទ័រ និងអ៊ីនធឺណិតជាមូលដ្ឋានជាច្រើនទៀត ។
បច្ចុប្បន្ន កម្មវិធីទាំងនេះ កំពុងត្រូវបានប្រើប្រាស់នៅគ្រប់មជ្ឈមណ្ឌលគរុកោសល្យ និងវិក្រឹត្តការ និងគ្រប់វិទ្យាល័យដែលមានកុំព្យូទ័រក្នុងព្រះរាជាណាចក្រ កម្ពុជា ។
ក្រសួងបានទទួលស្គាល់ថា ការប្រើប្រាស់បច្ចេកវិទ្យាយ៉ាងទូលំទូលាយ ដែលជាសារធាតុយ៉ាងចាំបាច់មួយ
សម្រាប់ការអភិវឌ្ឍសេដ្ឋកិច្ចកម្ពុជា គឺអាចធ្វើទៅបានលុះត្រាតែបច្ចេកវិទ្យានេះប្រើប្រាស់ជាភាសាជាតិរបស់ខ្លួន ។
មិនតែប៉ុណ្ណោះ ក្រសួងក៏យល់ឃើញដែរថា ប្រព័ន្ធអប់រំគឺ ជាយានមួយ
សម្រាប់សាបព្រោះចំណេះដឹងខាងបច្ចេកវិទ្យាទៅពាសពេញប្រទេសយ៉ាងលឿនបំផុត ។
ព្រះមហាក្សត្រិយានី បានបង្ហាញនូវចំណាប់អារម្មណ៍យ៉ាងពិសេសអំពីលទ្ធផល
នៃបន្ទប់ពិសោធន៍ស្រាវជ្រាវកុំព្យូទ័រតម្លៃទាបសម្រាប់វិស័យអប់រំ ដែលជាផ្នែកមួយនៃកម្មវិធីសាលារៀន
បើកចំហ ហើយបច្ចុប្បន្នកំពុងសិក្សា និងបង្កើតនូវកុំព្យូទ័រដែលប្រើប្រាស់អគ្គិសនី និងតម្រូវការថែទាំតិចតួច
បំផុត ដែលកម្រមាននៅក្នុងប្រទេសកម្ពុជា ។ កុំព្យូទ័រទាំងនេះ រួមទាំងការស្រាវជ្រាវបច្ចុប្បន្នទៅលើ
កម្មវិធីសិក្សា ការអប់រំពីចម្ងាយនិងករតភ្ជាប់ នឹងក្លាយជាផ្នែកមួយនៃគម្រោងផែនការមេសម្រាប់បច្ចេកវិទ្យា គមនាគមន៍ព័ត៌មានវិទ្យាក្នុងវិស័យអប់រំ ។ គម្រោងផែនការមេនេះ បច្ចុប្បន្នកំពុងត្រូវបានក្រសួងអប់រំ យុវជន
និងកីឡា និង អង្គការវិទ្យាស្ថានបើកទូលាយ រៀបចំឡើង ។
គម្រោង KhmerOS និងកម្មវិធីសាលារៀនបើកចំហ ប្រតិបត្តិការក្រោមការជួយឧបត្ថម្ភហិរញ្ញវត្ថុ
ពីសហប្រតិបត្តិការអេស្ប៉ាញ (Spanish Cooperation), UNESCO និង InWent ។

សិក្ខាសាលាថ្នាក់ជាតិស្ដីពីកម្មវិធីអប់រំ "វិថីសន្តិភាពសម្រាប់កុមារ"
រាជធានីភ្នំពេញ៖ យោងតាមសេចក្ដីប្រកាសព័ត៌មានរបស់អង្គការទស្សនៈពិភពលោកថ្ងៃទី
១១ មីនា បានឲ្យដឹងថា បន្ទាប់ពីបានធ្វើការងារអស់រយៈពេល៥ឆ្នាំដើម្បីបង្កើតកម្មវិធីអប់រំ
"វិថីសន្តិភាពសម្រាប់កុមារ"រួចមក អង្គការទស្សនៈពិភពលោកដោយសហការជាមួយក្រសួង
អប់រំ យុវជន និងកីឡា នឹងរៀបចំសិក្ខាសាលាថ្នាក់ជាតិមួយស្ដីពីកម្មវិធីអប់រំ "វិថីសន្តិភាពសម្រាប់កុមារ"។
កម្មវិធីអប់រំនេះ គឺជាវិធីសាស្ត្រនៃការអប់រំមួយដែលគេអាចប្រើដើម្បីពង្រឹងដល់កុមារ និងយុវជន ក្នុងនាមជាអ្នកកសាងសន្តិភាពនៅក្នុងសហគមន៍របស់ពួកគេ។
គម្រោងអប់រំសន្តិភាពរបស់អង្គការទស្សនៈពិភពលោក បានធ្វើការបណ្ដុះបណ្ដាលដល់សិស្សានុសិស្សនៅតាមសាលាបឋមសិក្សា និង
អនុវិទ្យាល័យចំនួន២៧ និងកុមារនៅតាមសហគមន៍ស្ដីពីកម្មវិធីវិថីសន្តិភាពសម្រាប់កុមារ។ បន្ទាប់ពីបានទទួលការបណ្ដុះបណ្ដាលនោះរួចមក ពួកគេបានចាប់ផ្ដើមធ្វើការបំផុសចលនា
ដល់ក្រុមរបស់ពួកគេ និងធ្វើការអំពាវនាវដល់សមាជិក
សហគមន៍ ដើម្បីនាំយកមកនូវសន្តិភាពដល់ភូមិរបស់ពួកគេ។ ការបណ្ដុះបណ្ដាលនេះ
បានផ្ដល់អំណាចដល់សិស្សានុសិស្ស និងកុមារដើម្បីធ្វើការអំពាវនាវដល់សហគមន៍ឲ្យការពារកុមារ។
កម្មវិធី "វិថីសន្តិភាពសម្រាប់កុមារ" មាន៦ជំពូក ដែលរួមមានការស្វែងយល់ តើយើងជានរណា
ភាពផ្សេងៗគ្នា សមភាពយេនឌ័រ ការសប្បាយដោយមិនឲ្យនរណាម្នាក់មានការឈឺចាប់ទំនាក់ទំនងល្អ
និងមានសុវត្ថិភាព និងការកសាងសន្តិភាព។
លោក កេតុ ច័ន្ទតូ ជាអ្នកគ្រប់គ្រងកម្មវិធីអប់រំនៃអង្គការទស្សនៈពិភពលោកបានបង្ហាញពីសមិទ្ធផលគួរ
ឲ្យកត់សំគាល់ក្រោយពីការអនុវត្តនូវកម្មវិធីនេះរួចមក។
លោកមានប្រសាសន៍ថា "សិស្សានុសិស្ស និងកុមារជាច្រើននាក់បានចូលរួមក្នុងក្លឹបយុវជន និងក្លឹបកុមារ។ បន្ទាប់ពីបានចូលរួមក្នុងការបណ្ដុះបណ្ដាលនោះរួចមក ពួកគេបានបង្កើតទំនាក់ទំនងយ៉ាងល្អជាមួយគ្នា។ ពួកគេចេះជួយគ្នាទៅវិញទៅមក ពួកគេមានភាពក្លាហាន និងត្រៀមខ្លួនជាស្រេចដើម្បីធ្វើការបញ្ឈប់អំពើ
ហិង្សា ការប្រើប្រាស់គ្រឿងញៀន និងបង្កើតឲ្យមាននូវសិទ្ធិកុមារនៅក្នុងភូមិរបស់ពួកគេ។ បន្ទាប់ពីការបំពាក់បំប៉នឲ្យមានសមត្ថភាពគ្រប់គ្រាន់ហើយនោះ ពួកគេក៏បន្តសម្របសម្រួលនូវការបណ្ដុះ
បណ្ដាលដល់ក្លឹបកុមារនៅក្នុងភូមិរបស់ពួកគេ។
ដើម្បីទទួលស្គាល់នូវស្នាដៃដ៏មានអត្ថប្រយោជន៍នៃកម្មវិធីនេះដែលជួយកសាងសហគមន៍ឲ្យប្រសើរឡើង
នោះ ក្រសួងអប់រំយុវជន និងកីឡាបានអនុញ្ញាតឲ្យបោះពុម្ពផ្សាយកម្មវិធីអប់រំ "វិថីសន្តិភាពសម្រាប់កុមារ"
ដែលជាស្នាដៃ និងរៀបរៀងឡើងដោយអង្គការទស្សនៈពិភពលោកដើម្បីយកទៅប្រើប្រាស់ជាមេរៀន
បណ្ដុះបណ្ដាលក្នុងកម្មវិធីបំណិនជីវិតមូលដ្ឋាន។ កម្មវិធីនេះអាចយកទៅប្រើប្រាស់ចាប់ពីកម្រិតបឋមសិក្សារហូតដល់វិទ្យាល័យសម្រាប់ការអប់រំក្នុង ឬក្រៅប្រព័ន្ធ។
ប្រធានមន្ទីរអប់រំទាំង២៣ខេត្ត និងរាជធានី តំណាងនាយកដ្ឋាននីមួយៗដូចជា នាយកដ្ឋានបណ្ដុះបណ្ដាល និងវិក្រឹតការនាយកដ្ឋានបឋមសិក្សា នាយកដ្ឋានមធ្យមសិក្សាចំណេះទូទៅតំណាងអង្គការក្រៅរដ្ឋាភិបាលជាតិ និងអន្តរជាតិប្រមាណជា៣០អង្គការនឹងមានវត្តមាននៅក្នុងសិក្ខាសាលានេះ។ នាឱកាសនោះផងដែរ សៀវភៅស្ដីពីកម្មវិធីអប់រំ "វិថីសន្តិភាពសម្រាប់កុមារ" នឹងត្រូវចែកជូនដល់មន្ទីរអប់រំ យុវជន និងកីឡា
ខេត្ត និងរាជធានី"៕