គ្រឹះស្ថានឧត្ដមសិក្សាមានការរីកចម្រើនគួរឲ្យកត់សម្គាល់ តែគុណភាពគួរតែគិតគូរ
រាជធានីភ្នំពេញ៖ មន្ត្រីក្រសួងអប់រំបានថ្លែងកាលពីថ្ងៃទី ១៦ មីនា ឆ្នាំ២០០៩ថា កំណើននៃសាលារៀន និងសិស្សសាលាចាប់ពីមតេ្តយ្យរហូតដល់វិទ្យាល័យ មានការកើនឡើងយ៉ាងខ្លាំងនាប៉ុន្មានឆ្នាំចុងក្រោយនេះ ដែលក្នុងនោះ សាលាមតេ្តយ្យរដ្ឋមានចំនួន១.៦៣៤ សាលាបឋមសិក្សា៦.៤៧៦ អនុវិទ្យាល័យមានចំនួន១.០០៦ និងវិទ្យាល័យកើនឡើងរហូតដល់៣១៥។ តួលេខនេះត្រូវបានបង្ហាញឲ្យដឹងនៅក្នុងសន្និបាតបូកសរុបការងារ របស់ក្រសួងអប់រំ ដែលបានប្រារព្ធធ្វើកាលពីថ្ងៃទី១៦ មីនា នៅវិទ្យាស្ថានជាតិអប់រំ ក្រោមអធិបតីភាពលោកជំទាវឧបនាយករដ្ឋមន្ត្រីម៉ែន សំអន។
លោក អ៊ឹម សិទ្ធី រដ្ឋមន្ត្រីក្រសួងអប់រំបានមានប្រសាសន៍ថា ជាមួយនឹងគុណភាពអប់រំ ដែលកំពុងត្រូវបានលើកកម្ពស់នេះ បរិមាណអប់រំនៅដើមឆ្នាំ២០០៨-២០០៩ មានការប្រែប្រួលថ្មីគួរឲ្យមានមោទនភាពក្រៃលែង នៅក្នុងនោះគឺមានសាលាមតេ្តយ្យរបស់រដ្ឋចំនួន១.៦៣៤កន្លែង សិស្សចំនួន៧៩.៥៨៤នាក់ (កុមារី៤០.០១៣នាក់) សាលាបឋមសិក្សាបានកើនឡើងដល់៦.៤៧៦ សិស្សចំនួន ២.៣១១.១០៧(ស្រីចំនួន១.០៩៤.៥៧៧នាក់) សាលាមធ្យមសិក្សាមានអនុវិទ្យាល័យកើនឡើងដល់១.០០៦សិស្សពីថ្នាក់ទី ៧ដល់ថ្នាក់ទី៩ ចំនួន៦៣៧.៦២៩នាក់ ក្នុងនោះស្រី២៩៦.៤០៧នាក់ និងវិទ្យាល័យកើនឡើងរហូតដល់៣១៥ សិស្សពីថ្នាក់ទី១០ ដល់ថ្នាក់ទី១២ ចំនួន២៦០.៩៦៥នាក់ ក្នុងនោះស្រី១០៦.៧៨២នាក់។
យោងតាមរបាយការណ៍របស់ក្រសួងអប់រំយុវជន និងកីឡាបានឲ្យដឹងថា នៅផ្នែកឧត្ដមសិក្សា ក៏មានការរីកចម្រើនគួរឲ្យកត់សម្គាល់ផងដែរ ទាំងខាងគុណភាព និងខាងបរិមាណ។ គ្រឹះស្ថានឧត្ដមសិក្សាទាំងអស់មានចំនួន៧៧ ក្នុងនោះផ្នែកសាធារណៈរបស់រដ្ឋមានចំនួន៣២ និងផ្នែកឯកជនមានចំនួន៤៥ ដែលកំពុងចាប់ដៃគ្នាជាដៃគូអភិវឌ្ឍន៍ ក្នុងការបណ្ដុះបណ្ដាលធនធានមនុស្សកម្រិតខ្ពស់ឲ្យដល់និស្សិតសរុប ទាំងអស់ចំនួន១៣៧.៤០០នាក់ ទូទាំងប្រទេស ក្នុងនោះថ្នាក់បណ្ឌិត៨៦២នាក់ អនុបណ្ឌិត១១.៦៨១នាក់ បរិញ្ញាបត្រ១១០.០០០នាក់ និងថ្នាក់បរិញ្ញាបត្ររង១៤.៨៥៧នាក់។
លោកជំទាវម៉ែន សំអន តំណាងឲ្យសម្ដេចនាយករដ្ឋមន្ត្រី ហ៊ុន សែន បានមានប្រសាសន៍ថា រាជរដ្ឋាភិបាលបានកំណត់រួចហើយថា«ការអប់រំ គឺជាមូលដ្ឋានគ្រឹះដ៏រឹងមាំ ក្នុងការអភិវឌ្ឍសេដ្ឋកិច្ច-សង្គម និងធានាឲ្យបាននូវកំណើនសេដ្ឋកិច្ចមួយប្រកបដោយចីរភាព ឆ្ពោះទៅរកការកាត់បន្ថយភាពក្រីក្ររបស់ប្រជាពលរដ្ឋជាបណ្តើរៗ»។ ការងារអប់រំ គឺជាការវិនិយោគមួយដែលប្រើប្រាស់ធនធាន និងពេលវេលាច្រើន ប៉ុន្តែលទ្ធផលទទួលបានមានលក្ខណៈអរូបីយ ហើយក៏ជាការវិនិយោគ ដើម្បីប្រសិទ្ធភាពការងារបច្ចុប្បន្ន និងការត្រៀមបម្រុងសម្រាប់អនាគត ដែលត្រូវឆ្លើយតបនឹងតម្រូវការទីផ្សារ។
លោកជំទាវម៉ែន សំអន បន្តទៀតថាក្រសួងអប់រំកំពុងប្រឈមនឹងភាពរីកចម្រើនយ៉ាងឆាប់រហ័ស នៃឧត្ដមសិក្សាទាំងផ្នែកសាធារណៈ និងផ្នែកឯកជន។ លោកជំទាវបន្តថា « បញ្ហាសំខាន់នៅទីនេះ គឺទាំងអស់គ្នាត្រូវផ្ដោតជាសំខាន់ទៅលើការបណ្ដុះបណ្ដាលបច្ចេកទេស វិជ្ជាជីវៈ និងមុខរបរឲ្យបានកាន់តែច្រើន ដើម្បីដោះស្រាយបញ្ហាការងារធ្វើឲ្យនិស្សិតផង និងឆ្លើយតបទៅនឹងតម្រូវការនៃខឿនសេដ្ឋកិច្ចរបស់ប្រទេសជាតិផង»។
លោក រីឆាដ ប្រាយដល មន្ត្រីអង្គការយូនីសេហ្វបានថ្លែងថា ចំណុចសំខាន់មួយដែលបានរំលេចក្នុងរបាយការណ៍នេះ គឺបញ្ហាវិសមភាព និងវិសមធម៌ដែលកើតមាននៅតាមវ៉េបសាយ និងនៅក្នុងចំណោមក្រុមសង្គមកិច្ច។ លោកបន្តថា ខណៈដែលកុមារ៩៣ភាគរយបានចូលរៀននៅបឋមសិក្សា ដែលនេះជាសមិទ្ធផលដ៏ធំចម្បងមួយ តែនៅសល់កុមារ៧ភាគរយទៀត មិនបានចូលសាលារៀន ហើយយើងមានការលំបាកខ្លាំងក្នុងការស្វែងរកកុមារទាំងនេះ៕


សិទ្ធិមនុស្ស និងប្រជាធិបតេយ្យនៅកម្ពុជា
កាលពីថ្ងៃសុក្រទី ១៣ មីនាកន្លងទៅនេះ គណៈកម្មការសហគមន៍អឺរ៉ុបប្រចាំកម្ពុជាបានចេញសេចក្ដីប្រកាសព័ត៌មាន មួយដោយបើកទទួលសំណើសុំជំនួយហិរញ្ញវត្ថុចំនួន ៦០០.០០០ អឺរ៉ូ ដែលស្មើប្រមាណជា ៧៦៧.០០០ ដុល្លារ ដើម្បីគាំទ្រគម្រោងសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។ គម្រោងនេះមានបំណងពង្រឹងតួនាទីនៃអង្គការសង្គមស៊ីវិល ដើម្បីលើកកម្ពស់ សិទ្ធិមនុស្ស និងកំណែទម្រង់ប្រជាធិបតេយ្យនៅកម្ពុជា។ នៅក្នុងសេចក្ដីប្រកាសនោះ លោក រ៉ាហ្វែល ដូចាវម៉ូរ៉េណូ (Rafael DochaoMoreno) ភារធារីនៃប្រតិភូគណៈកម្មការសហគមន៍អឺរ៉ុបប្រចាំនៅកម្ពុជាបាន បញ្ជាក់ថា សិទ្ធិមនុស្ស និងទ្ធិប្រជាធិបតេយ្យ គឺជាសសរគ្រឹះរបស់សហភាពអឺរ៉ុប និងមានសារសំខាន់ជាមូលដ្ឋានសម្រាប់រាល់សកម្មភាពទាំងឡាយដែលគាំទ្រ ដោយសហភាពអឺរ៉ុបនៅក្នុងប្រទេសកម្ពុជា ទើបគណៈកម្មការសហគមន៍អឺរ៉ុបចាត់ទុកថា សិទ្ធិមនុស្ស និងលទ្ធិប្រជាធិបតេយ្យគឺជាការសំខាន់ដើម្បីបន្តជួយគាំទ្រដល់ ការងារជាសារវន្តរបស់អង្គការសង្គមស៊ីវិលនៅកម្ពុជា។
ទាក់ទិននឹងជំនួយលើការងារសិទ្ធិមនុស្ស និងលទ្ធិប្រជាធិបតេយ្យនេះគឺមិនមែនជាលើកទីមួយទេដែលកម្ពុជានឹង ទទួលបាន។ កន្លងមកកម្ពុជាក៏បានទទួលប្រាក់ជំនួយរាប់លានដុល្លារពីអាមេរិក និងពីប្រទេសនានានៅទ្វីបអឺរ៉ុបតាមរយៈសហភាពអឺរ៉ុបផង និងតាមរយៈប្រទេសសាមីដោយផ្ទាល់ផង។ ប្រាក់ជំនួយទាំងនោះគឺដើម្បីពង្រឹងសិទ្ធិអំណាចប្រជាពលរដ្ឋ ដែលក្នុងនោះក៏មានសិទ្ធិអំណាចរបស់ស្ត្រីផងដែរតាំងពីថ្នាក់ជាតិ រហូតដល់ថ្នាក់មូលដ្ឋាន។ យើងសូមអបអរ និងស្វាគមន៍ចំពោះជំនួយដ៏សប្បុរសនេះ។
ជាការពិត គេមិនដែលឲ្យលុយឧកញ៉ា មហាសេដ្ឋី ឬអ្នកមានសម្បត្តិស្ដុកស្ដម្ភយកទៅធ្វើអ្វីមួយ ដែលខ្លួនអាចធ្វើបាននោះ
ទេ តែគេពិតជាឲ្យអ្នកក្រីក្រដែលគ្មានលទ្ធភាព ដើម្បីឲ្យពួកគេទទួលបានប្រយោជន៍ពីការឧបត្ថម្ភទាំងនេះ។ ដូចគ្នានេះដែរ គេមិនដែលឲ្យជំនួយទៅប្រទេសមួយ ដែលសិទ្ធិមនុស្ស និងលទ្ធិប្រជាធិបតេយ្យត្រូវបានគេគោរព និងប្រតិបត្តិនោះដែរ។ នៅត្រង់ចំណុចនេះ ទំនងជាសិទ្ធិមនុស្ស និងលទ្ធិប្រជាធិបតេយ្យនៅកម្ពុជាមានចំណុចខ្សោយ ទើបអ្នកមានលុយផ្ដល់ជំនួយ ដើម្បីធ្វើឲ្យវិស័យនេះបានប្រសើរឡើង។ គេមិនចេះតែឲ្យលុយរាប់សែនរាប់លានដុល្លារមកចាយវាយលេងនោះទេ ព្រោះលុយទាំងនោះបានមកពីញើសឈាមនៃការបង់ពន្ធពីប្រជាពលរដ្ឋ របស់គេ។
រឿងគោរពសិទ្ធិមនុស្សគឺមិនមែនថ្មីនៅកម្ពុជាឡើយ។ ធម៌ព្រះពុទ្ធបានចែងដែរថា កុំថាឡើយមនុស្ស សូម្បីតែសត្វដែលមានជីវិតរស់នៅក្នុងចក្រវាលនេះ ក៏ប្រាថ្នាចង់រស់រានមានសេរីភាពដូចៗគ្នា ដោយព្រះអង្គបានហាមមិនឲ្យសម្លាប់ជីវិត មិនឲ្យធ្វើបាបសូម្បីតែសត្វ ព្រោះនេះជាអំពើបាបចូលនរកប្រេត។ នេះមានន័យថា ការគោរពសិទ្ធិមនុស្សនៅកម្ពុជាមានតាំងពីបុរាណកាលមក គឺមិនមែនមានបន្ទាប់ពីការណែនាំ និងការបង្ហាញពីពួកបច្ជឹមប្រទេសនោះទេ។
បច្ចុប្បន្ននេះ ទាំងព្រឹទ្ធសភា ទាំងរដ្ឋសភា និងរាជរដ្ឋាភិបាលកម្ពុជាមានគណៈកម្មាធិការសិទ្ធិមនុស្ស ខណៈដែលមានសង្គមស៊ីវិលជាច្រើនក៏កំពុងតែអនុវត្តកិច្ចការនេះយ៉ាង សកម្ម។ ចុះបើមានគណៈកម្មាធិការ និងស្ថាប័នដែលបាននិងកំពុងធ្វើកិច្ចការសិទ្ធិមនុស្ស និងលទ្ធិប្រជាធិបតេយ្យយ៉ាងច្រើនបែបនេះ ដោយពួកគេបានចាយលុយរាប់សែនរាប់លានដុល្លាររបស់រាជរដ្ឋាភិបាលផង ពីប្រទេសម្ចាស់ជំនួយផង ចុះហេតុអ្វីបានជាវិស័យនេះនៅទុនខ្សោយបណ្ដោយឲ្យគេផ្ដល់លុយមក ប្រដៅយើងដែលជាអ្នកមានត្រកូលខ្ពង់ខ្ពស់ និងមានអរិយធម៌រុងរឿងនោះទៅវិញ?
មិនអាចប្រកែកបានទេដែលថា មានកត្តាជាច្រើននៅក្នុងសង្គមកម្ពុជាដែលបង្កឲ្យមានភាព ស្មុគស្មាញចំពោះបញ្ហានេះ។ ទីមួយ ការមិនសហការគ្នាបានល្អរវាងគណៈកម្មាធិការសិទ្ធិមនុស្សរបស់រាជ រដ្ឋាភិបាល និងសង្គមស៊ីវិលក្នុងការងារ
សិទ្ធិមនុស្សនេះ។
ពួកគេយកត្រូវតែទាំងសងខាង។ ជារឿយៗ របាយការណ៍សិទ្ធិមនុស្សតែងតែមានលក្ខណៈផ្ទុយគ្នា គឺថា របាយការណ៍របស់រាជរដ្ឋាភិបាលថាល្អ តែសង្គមស៊ីវិលដែលពាក់ព័ន្ធថាមិនត្រឹមត្រូវ ដែលធ្វើឲ្យពួកគេខ្វែងគំនិតគ្នា ដោយពេលខ្លះមានការប្រមាថពីថ្នាក់ដឹកនាំជាន់ខ្ពស់របស់រាជរដ្ឋាភិបាល ដល់សកម្មជនសិទ្ធិមនុស្សរបស់សង្គមស៊ីវិល និងរបស់ការិយាល័យសិទ្ធិមនុស្សសហប្រជាជាតិប្រចាំកម្ពុជា ដោយរួមទាំងម្ចាស់ជំនួយផ្នែកសិទ្ធិមនុស្សផង។ ពួកគេបានទម្លាក់កំហុសឲ្យគ្នាទៅវិញទៅមក ហើយយកត្រូវតែរៀងៗខ្លួន។ ជាក់ស្ដែង កាលពីថ្ងៃទី ១៣ មីនាកន្លងទៅនេះ រាជរដ្ឋាភិបាលកម្ពុជាបានក្ដៅស្លឹកត្រចៀក ហើយបដិសេធ និងរិះគន់ដល់ របាយការណ៍មួយ ដែលចេញផ្សាយកាលពីថ្ងៃទី ២៧ កុម្ភៈកន្លងទៅនេះដោយក្រសួងការបរទេសសហរដ្ឋអាមេរិក ដោយក្នុងរបាយការណ៍នោះបានលើកឡើងថា ការគោរពសិទ្ធិមនុស្សនៅមិនទាន់ល្អនៅឡើយទេ។
របាយការណ៍ក្រសួងការបរទេសសហរដ្ឋអាមេរិកនោះ បានបញ្ជាក់
ថា មានកងកម្លាំងសន្តិសុខប្រព្រិត្តខុសមិនបានទទួលទោសទណ្ឌ មានការរំលោភដល់អ្នកទោសជាប់ឃុំឃាំង មានការរំលោភដីធ្លី មានការបណ្ដេញមនុស្សចេញពីលំនៅឋានដោយបង្ខំ ដែលក្នុងនោះមានទាំងស្ត្រីមេម៉ាយផង មានការរីករាលដាលអំពើពុករលួយ ប្រព័ន្ធតុលាការនៅទុនខ្សោយ ហើយពលរដ្ឋមិនបានទទួលការកាត់
សេចក្ដីដោយយុត្តិធម៌ជាដើម។
រឿងនេះ រាជរដ្ឋាភិបាលកម្ពុជាថាមិនពិត តែសកម្មជនសិទ្ធិមនុស្សរបស់សង្គមស៊ីវិលថាបញ្ហានេះវាពិតជាបាន
ឆ្លុះបញ្ចាំងពីភាពជាក់ស្ដែងនៅក្នុងសង្គមកម្ពុជាបច្ចុប្បន្នមែន។
ទីពីរគឺការអប់រំ និងការយល់ដឹងពីសេចក្ដីថ្លៃថ្នូរ និងសិទ្ធិជាមូលដ្ឋានរបស់មនុស្ស និងសិទ្ធិស្របច្បាប់ដែលមាន
ចែងនៅក្នុងរដ្ឋធម្មនុញ្ញរបស់ប្រទេស និងក្នុងក្របខ័ណ្ឌសកលផងនៅមានកម្រិតមិនត្រឹមតែក្នុងចំណោមពលរដ្ឋ ធម្មតាប៉ុណ្ណោះនោះទេ ប៉ុន្តែសូម្បីតែក្នុងចំណោមមន្ត្រីអាជ្ញាធរអនុវត្តច្បាប់ខ្លះក៏ អញ្ចឹងដែរ។ ទីបីអំពើពុករលួយ។
ចំណុចនេះតែងតែត្រូវបានពលរដ្ឋ និងសកម្មជនសិទ្ធិមនុស្សត្អូញត្អែរថា មិនមានយុត្តិធម៌សម្រាប់មនុស្សទូទៅ គឺអនុវត្តបានតែអ្នកទន់ខ្សោយ តែមន្ត្រីមានមានអំណាច មានលុយ និងអ្នកមានខ្នងបង្អែកគឺគ្មានបញ្ហា បើទោះជាពេលខ្លះមានការរំលោភសិទ្ធិដោយខុសច្បាប់ ឬបង្កបទល្មើសជាក់ស្ដែងក៏ដោយ។
ទីបួនទំនងជាការអនុវត្តច្បាប់នៅមានចំណុចខ្វះខាតច្រើន ពិសេសនៅតាមមូលដ្ឋាន ដែលភាគច្រើនហេតុការណ៍ត្រូវបានផ្អឹបចោលដោយអាជ្ញាធរមូលដ្ឋាន ដែលធ្វើឲ្យអាជ្ញាធរថ្នាក់កណ្ដាល និងថ្នាក់ជាតិមិនបានដឹង ឬក៏ទទួលបានរបាយការណ៍ដែរ តែរបាយការណ៍នោះមិនគ្រប់ជ្រុងជ្រោយ ឫមានការលាក់
លៀម ចំពោះអាជ្ញាធរថ្នាក់កណ្ដាល និងថ្នាក់ជាតិ ដែលពាក្យគេតែងតែនិយាយថា "ប៉ូលាឯកសារយកគាប់ថ្នាក់លើ" ។ ឆ្លៀតឱកាស មន្រ្តីសិទ្ធិមនុស្ស និងគណបក្សប្រឆាំងបានវាយសម្រុកចាប់យកចំណុចអវិជ្ជមានវាយប្រហារដោយ ចំៗដល់ចំណាត់ការរបស់អាជ្ញាធរ ដែលស្ថិតនៅក្រោមការគ្រប់គ្រងរបស់រាជរដ្ឋាភិបាល។ ចំណុចនេះបានធ្វើឲ្យរាជរដ្ឋាភិបាលមួម៉ៅ ខឹងសម្បារ ក្ដៅក្រហាយ កើតទុក្ខមិនសុខចិត្ត ដោយធ្វើការឆ្លើយតប និងរិះគន់វិញថា ជាព័ត៌មានបំផ្លើស មិនពិត គ្មានមូលដ្ឋានច្បាស់លាស់ និងបង្ខូចកេរ្តិ៍ឈ្មោះដល់រាជរដ្ឋាភិបាល ដែលបានខិតខំប្រឹងប្រែងធ្វើឲ្យប្រទេសក្លាយជានីតិរដ្ឋនោះ។
បញ្ហានៃការបន្ទោសគ្នានេះមិនមែនជារឿងចម្លែកឡើយ តែវាសឹងតែក្លាយជារឿងប្រពៃណីទៅហើយរវាងស្ថាប័នទាំងពីរនេះ។
រឿងសំខាន់គឺមិនមែនការបន្ទោស ការប្រមាថ ការប្រើពាក្យតិះដៀល និងដៀមដាម ឬការគំរាមគ្នានោះទេ។
កម្ពុជាជារដ្ឋមួយ មានពូជសាសន៍ថ្លៃថ្នូរបវររុងរឿងចារក្នុងប្រវត្តិសាស្ត្រមនុស្សជាតិ ដែលពិភពលោកទទួលស្គាល់
ថាពិតជាអញ្ចឹងមែនតាំងពីសម័យអង្គរមក ម្ល៉េះ។
ហេតុនេះ ទាំងរាជរដ្ឋាភិបាល ទាំងគណបក្សប្រឆាំង និងអង្គការសង្គមស៊ីវិលដែលពាក់ព័ន្ធនឹងការងារសិទ្ធិមនុស្ស និងលទ្ធិប្រជាធិបតេយ្យ ពិសេសអ្នកដែលនឹងទទួលបានជំនួយពីគណៈកម្មការសហគមន៍អឺរ៉ុបខាងមុខនេះ ត្រូវលើកយកបញ្ហាអវិជ្ជមានមកដាក់លើតុ ពិភាក្សាគ្នាដោយត្រង់ៗមិនលាក់លៀម និងដោយភក្ដី ខិតខំស្វែងរកចំណុចខ្លាំងរួមដើម្បីពង្រឹងបន្ថែម និងរកចំណុចខ្សោយដើម្បីលុបបំបាត់។ ទាំងអស់គ្នាមិនមែនចាំតែរកចំណុចខ្សោយរបស់ភាគីម្ខាងៗ ដើម្បីប្រយោជន៍នយោបាយតែរៀងៗខ្លួននោះទេ។ ការធ្វើបែបនេះ អ្នកដែលរងគ្រោះពីការរំលោភសិទ្ធិនោះគឺពលរដ្ឋតូចតាច ពិសេសស្ត្រី ដែលត្រូវបានគេប្រើហង្សា
រំលោភបំពានរាល់ថ្ងៃ។
យើងត្រូវរួមគ្នាជួយពង្រឹងការអប់រំ ការផ្សព្វផ្សាយបន្ថែមពីសេចក្ដីថ្លៃថ្នូរ និងសិទ្ធិជាមូលដ្ឋាន និងសិទ្ធិស្របច្បាប់របស់
មនុស្សដែលមានចែងនៅក្នុងរដ្ឋធម្មនុញ្ញរបស់ប្រទេស និងក្នុងក្របខ័ណ្ឌសកល និងពីការដាក់ទោសអ្នករំលោភសិទ្ធិ
មនុស្ស និងគូកនទៅតាមច្បាប់កំណត់ឲ្យបានដល់សហគមន៍ជនបទនានា។
ការអប់រំ និងការផ្សព្វផ្សាយនេះត្រូវធ្វើជាប្រចាំ និងដោយស្មោះត្រង់ ដោយបង្ហាញពីផលប្រយោជន៍សិទ្ធិមនុស្ស និងលទ្ធិប្រជាធិបតេយ្យ ។
មានតែការរួមសហការគ្នាប៉ុណ្ណោះ ទើបយើងអាចស្តាកិត្តិយស និងសេចក្ដីថ្លៃថ្នូររបស់ជាតិយើងឡើងវិញបាន ហើយអាចពង្រឹងសិទ្ធិរបស់ពលរដ្ឋ ពិសេសសិទ្ធិស្ត្រីរបស់យើង ដើម្បីការអភិវឌ្ឍ ក្នុងដំណាក់កាលដែលពិភពលោក
ស្ថិតនៅក្នុងសកលភាវូបនីយកម្ម។
ឫមួយក៏សុខចិត្តទទួលយកលុយបរទេសមកអនុវត្តការងារ ហើយបណ្ដោយឲ្យពួកគេចេះតែប្រមាទ និងប្រដៅកម្ពុជាជាហូរហែតរៀងទៅពីរឿងសិទ្ធិមនុស្ស និងប្រជាធិបតេយ្យនេះ?


កម្ពុជាធ្វើជាម្ចាស់ផ្ទះ នៃកិច្ចប្រជុំក្រុមជំនាញច្បាប់អាស៊ាន
រាជធានីភ្នំពេញ៖ ក្រុមជំនាញការច្បាប់ជាន់ខ្ពស់អាស៊ានទាំង១០ប្រទេស បានចូលរួមក្នុងកិច្ចប្រជុំមានរយៈពេល៣ថ្ងៃ ចាប់ពីថ្ងៃទី១៦ ដល់ថ្ងៃទី១៨ មីនា ឆ្នាំ២០០៩ នៅសណ្ឋាគារភ្នំពេញ រាជធានីភ្នំពេញ។ ភាគីនៃព្រះរាជាណាចក្រកម្ពុជាបានចាត់បញ្ជូនលោក ហេង វង្សប៊ុនឆាត តំណាងរាជរដ្ឋាភិបាលចូលរួមក្នុងកិច្ចប្រជុំក្រុមអ្នកជំនាញការ ច្បាប់ជាន់ខ្ពស់អាស៊ាននោះ។
គួររំលឹកថា ការរៀបចំកិច្ចប្រជុំក្រុមជំនាញការច្បាប់ជាន់ខ្ពស់អាស៊ានដែល រៀបចំធ្វើនៅប្រទេសកម្ពុជានេះ គឺជាកិច្ចប្រជុំលើកទី៩ ដែលកិច្ចប្រជុំលើកទី១- ធ្វើនៅប្រទេសសិង្ហបុរី លើកទី២- នៅប្រទេសហ្វីលីពីន លើកទី៣- នៅលេខាធិការដ្ឋានអាស៊ាន (ទីក្រុងហ្សាកាតា) ប្រទេសឥណ្ឌូនេស៊ី លើកទី៤- នៅប្រទេសសិង្ហបុរី លើកទី៥- នៅប្រទេសឥណ្ឌនេស៊ី លើកទី៦- នៅលេខាធិការដ្ឋានអាស៊ាន (ទីក្រុងហ្សាការតាប្រទេសឥណ្ឌូនេស៊ី) លើកទី៧- នៅសហភាពមីយ៉ាន់ម៉ា លើកទី៨- នៅប្រទេសប្រ៊ុយណេហើយកិច្ចប្រជុំលើក៩នេះ គឺធ្វើនៅប្រទេសកម្ពុជា។ ចំណែកកិច្ចប្រជុំលើកទី១០- គឺត្រូវប្រារព្ធធ្វើឡើងនៅទីក្រុងគូឡាឡាំពួរប្រទេសម៉ាឡេស៊ី។
មន្ត្រីក្រសួងការបរទេសនៃប្រទេសកម្ពុជាបានថ្លែងថា កិច្ចប្រជុំក្រុមជំនាញការច្បាប់ជាន់ខ្ពស់អាស៊ានលើកទី៩ ដែលកម្ពុជាធ្វើជាម្ចាស់ផ្ទះនេះ គឺទាក់ទងនឹងការតាក់តែងលិខិតបទដ្ឋានគតិយុត្តិផ្សេងៗ ដើម្បីភ្ជាប់ជាឧបសម្ពន្ធ និងពិធីសារបន្ថែមលើធម្មនុញ្ញអាស៊ានដែលប្រទេសជាសមាជិកអាស៊ានបាន អនុម័តរួចមកហើយ។ ធម្មនុញ្ញនេះមិនបានលំអិតលើចំណុចមួយចំនួនដែលក្រុមជំនាញការ ច្បាប់ជាន់ខ្ពស់អាស៊ានមានភារកិច្ចសិក្សាស្រាវជ្រាវពិភាក្សា និងតាក់តែងបទដ្ឋានគតិយុត្តិទាក់ទងនឹងចំណុចមួយចំនួនដូចជាការ តាក់តែងយន្តការនានាសម្រាប់ការដោះស្រាយ
វិវាទ តាក់តែងកិច្ចព្រមព្រៀងស្ដីពីបុព្វសិទ្ធិ និងអភ័យឯកសិទ្ធិ ដែលប្រទេសសមាជិកអាចផ្ដល់ជូនអង្គការអាស៊ាន ការតាក់តែងបទដ្ឋានគតិយុត្តិសម្រាប់អនុវត្តច្បាប់ជាតិចំពោះអង្គការ អាស៊ាន ការតាក់តែងបទដ្ឋានគតិយុត្តិអនុញ្ញាតឲ្យអាស៊ានចូលជាភាគីក្នុង កិច្ចព្រមព្រៀងអន្តរជាតិណាមួយ។ លោកបានបន្តថា កិច្ចការទាំងអស់នេះតាមការសិក្សា និងពិភាក្សាគ្នារយៈពេលវែងបន្តទៀតរវាងអ្នកជំនាញការច្បាប់ជាន់ ខ្ពស់នៃបណ្ដាប្រទេសអាស៊ាន។ ក្រៅពីនោះ កិច្ចប្រជុំលើកទី៩នេះ ក៏នឹងពិភាក្សាផងដែរ លើបញ្ហាផ្សេងៗមួយចំនួនទៀត ដែលទាក់ទងនឹងផលប្រយោជន៍អាស៊ានសម្រាប់ពេលខាងមុខ។
គួររំលឹកថា កិច្ចប្រជុំកំពូលអាស៊ានលើកទី១៤ ដែលរៀបចំធ្វើនៅប្រទេសថៃទើបតែបញ្ចប់នៅដើមខែមីនាកន្លងទៅថ្មីៗ នេះក្រោមប្រធានបទ "ធម្មនុញ្ញអាស៊ាន ដើម្បីប្រជាជនអាស៊ាន"។ ក្នុងកិច្ចប្រជុំកំពូលអាស៊ានលើកទី១៤នេះផងដែរ ប្រទេសសមាជិកទាំង១០បានចុះហត្ថលេខាលើឯកសារទាក់ទងទៅនឹងផែនការមេ របស់សមាគមអាស៊ានរួមមានសេចក្ដីប្រកាសស្ដីពីផែនទីមេសម្រាប់ បង្ហាញផ្លូវអាស៊ានឆ្នាំ២០០៩-២០១៥។
ផែនការលំអិតស្ដីពីសហគមន៍សន្តិសុខនយោបាយអាស៊ាន ផែនការលំអិតស្ដីពីសហគមន៍វប្បធម៌សង្គមអាស៊ាន នឹងគំនិតផ្ដួចផ្ដើមលើកទី២សម្រាប់ផែនការការងារសមាហរណកម្មអាស៊ាន។ ជាមួយនោះអាស៊ានក៏បានចេញនូវសេចក្ដីប្រកាសរួមស្ដីពីការសម្រេច បាននូវគោលដៅសហព័ន្ធរបស់អាស៊ាន និងសេចក្ដីថ្លែងការណ៍ស្ដីពីសន្ធិសុខស្បៀងក្នុងតំបន់អាស៊ាន ២០០៩-២០១៣៕


ក្រសួងអប់រំដាក់ឲ្យអនុវត្តកម្មវិធីអក្ខរាវិរុទ្ធ និងវេយ្យាករណ៍ភាសាខ្មែរ ជាលើកដំបូង ក្នុងប្រព័ន្ធកុំព្យូទ័រ
ភ្នំពេញ៖ អក្ខរាវិរុទ្ធសម្រាប់ភាសាខ្មែរលើកដំបូង និងវចនានុក្រមភាសាខ្មែរក្នុងប្រព័ន្ធកុំព្យូទ័រជាលើកដំបូងនៅ កម្ពុជា ត្រូវបានដាក់ឲ្យអនុវត្តជាផ្លូវការក្នុងប្រព័ន្ធព័ត៌មានវិទ្យា របស់ក្រសួងអប់រំ ដោយអង្គការវិទ្យាស្ថានបើកទូលាយនៅកម្ពុជា ។
លោកសុក ថា អនុប្រធានការិយាល័យព័ត៌មាន ទទួលបន្ទុកព័ត៌មានវិទ្យា ក្នុងវិស័យអប់រំបានមានប្រសាសន៍ឲ្យដឹងនៅថ្ងៃព្រហស្បតិ៍ ទី២៣ ខែសីហា កន្លងមកថា គម្រោងសម្រាប់វចនានុក្រមអក្ខរាវិរុទ្ធភាសាខ្មែរជាលើកដំបូង ត្រូវបានអនុវត្តដោយក្រសួងអប់រំយុវជននិងកីឡា ធ្វើឡើយដោយអង្គការវិទ្យាស្ថានបើកទូលាយ ដែលជាអង្គការក្រៅរដ្ឋាភិបាលក្នុងស្រុកមួយ កម្មវិធីនេះអនុវត្តការប្រើប្រាស់តាមប្រព័ន្ធយូនីកូដ ។
លោកបន្តថា <<នេះជាកម្មវិធីអក្ខរកម្មវចនានុក្រមភាសាខ្មែរជាលើកដំបូង ក្នុងប្រទេសកម្ពុជា ដែលបង្កើតឡើងដោយអង្គការវិទ្យាស្ថានបើកទូលាយ និងវិទ្យាស្ថានពុទ្ធសាសនបណ្ឌិត្យ ដោយផ្អែកតាមទម្រង់អក្សររបស់សម្ដេចព្រះសង្ឃរាជជួន ណាត>> ។ កម្មវិធីនេះត្រូវដាក់ឲ្យអនុវត្តក្នុងក្រសួងអប់រំដំបូង
គេ ដើម្បីបណ្ដុះបណ្ដាលកម្មវិធីកុំព្យូទ័រដល់មន្ត្រីអប់រំជាច្រើនរយ នាក់ ដែលរយៈពេលបណ្ដុះបណ្ដាលមានចំនួន៥ទៅ៧ឆ្នាំ ដោយប្រើប្រាស់ថវិកាប្រមាណ៣៥ម៉ឺនដុល្លារអាមេរិក ។
យោងតាមសេចក្ដីប្រកាសព័ត៌មានរបស់ក្រសួងអប់រំយុវជន និងកីឡាបានឲ្យដឹងថា ក្រសួងអប់រំ និងអង្គការវិទ្យាស្ថានបើកទូលាយបានចុះហត្ថលេខាមួយកាលពីដើម សប្ដាហ៍នេះ ដើម្បីអភិវឌ្ឍន៍រចនាសម្ព័ន្ធធនធានមនុស្សរបស់ក្រសួងអប់រំ សម្រាប់បណ្ដុះបណ្ដាលនូវការប្រើប្រាស់បច្ចេកវិជ្ជាទូរគមនាគមន៍ ព័ត៌មានវិទ្យា (ICT) ក្នុងប្រព័ន្ធអប់រំ ។ កិច្ចព្រមព្រៀងនេះក៏រួមបញ្ចូលផងដែរនូវការបង្កើតកម្មវិធី ICT សម្រាប់វិទ្យាល័យ សកលវិទ្យាល័យ ការស្រាវជ្រាវដើម្បីជ្រើសរើសនូវប្រព័ន្ធបច្ចេកវិទ្យា ICT ដែលសមល្មមសម្រាប់ប្រើប្រាស់ និងសំខាន់បំផុត គឺសេចក្ដីព្រាងផែនការមេសម្រាប់វិស័យ ICT នៅក្នុងប្រព័ន្ធអប់រំ ។ ដោយណែនាំជាលក្ខណៈប្រព័ន្ធ នូវការរីកចម្រើននៃការធ្វើសមាហរណកម្ម បច្ចេកវិទ្យាអប់រំទៅក្នុងគ្រប់ផ្នែកទាំងអស់ដូចជាការបង្រៀន ការរៀន និងការគ្រប់គ្រងនៅតាមសាលារៀន រយៈពេលពី៥ទៅ៧ឆ្នាំ ។
លោកណាត ប៊ុនរឿន អនុរដ្ឋលេខាធិការក្រសួងអប់រំយុវជននិងកីឡា បានមានប្រសាសន៍ថា ការផ្ដួចផ្ដើមរបស់ក្រសួង រួមជាមួយការអភិវឌ្ឍន៍របស់គម្រោងជាច្រើនពីអង្គការក្រៅរដ្ឋាភិបាល និងម្ចាស់ជំនួយដែលមានទិសដៅតែមួយ ដែលជាគោលនយោបាយ បានបង្កើតនូវកន្លែងប្រមូលផ្ដុំចាំបាច់ដើម្បីចាប់ផ្ដើមនូវដំណាក់ កាលថ្មីនៃសកម្មភាព ដែលនាំយើងទៅកាន់ប្រព័ន្ធអប់រំថ្មី ដែលបច្ចេកវិទ្យាគមនាគមន៍ព័ត៌មានវិទ្យានឹងជួយយើងធ្វើឲ្យប្រព័ន្ធ អប់រំកាន់តែប្រសើរ ។
លោកកុល ផេង ទេសរដ្ឋមន្ត្រី រដ្ឋមន្ត្រីក្រសួងអប់រំយុវជននិងកីឡា បានមានប្រសាសន៍ថា ក្រសួងបានយល់ច្បាស់អំពីបញ្ហានេះតាំងពីឆ្នាំ២០០៥ គឺនៅពេលដែលបានអភិវឌ្ឍន៍គោលនយោបាយ និងយុទ្ធសាស្ត្រល្អ ក្នុងការប្រើប្រាស់បច្ចេកវិទ្យាព័ត៌មានវិទ្យាសម្រាប់ការបង្រៀននិង រៀន ។
លោកបន្តដោយគូសបញ្ជាក់ថា <<ប្រទេសមួយរីកចម្រើន នៅពេលដែលប្រទេសនោះប្រើប្រាស់ប្រព័ន្ធព័ត៌មានវិទ្យាគមនាគមន៍ ព័ត៌មានវិទ្យាបើកទូលាយ ហើយបច្ចេកវិទ្យាគមនាគមន៍ព័ត៌មានវិទ្យា នឹងត្រូវប្រើប្រាស់ទូលំទូលាយនៅពេលដែលវាជាភាសាជាតិរបស់ប្រទេស នីមួយៗ>>៕


Labels